Njávdán Mátta-Várjjagis Finnmárkkus lea nuortasámi báikegoddi. Foto: Arve Kjersheim©Riikkaantikvára

Oassi Norgga eatnamiin lea maiddái sámiid eanan. Norgga bealde ásset sámit Davvi-Hedmárkku rájes Nuorta-Finnmárkku rádjái. Dán viiddis guovllu siskkobealde duođaštit sámi kulturmuittut rikkis ja girjás ovdahistorjjá ja historjjá, mas guolásteapmi, bivdu ja dađi mielde maiddái boazodoallu ja oapmedoallu leat guovddážis.

Kulturmuitosuodjaleapmi lea organiserejuvvon nu ahte Riikkaantikváras lea bajimus direktoráhttaovddasvástádus. Sámi kulturmuittuid hálddašeami ovddasvástádus lea biddjon Sámedikki ealáhus-, biras- ja vuoigatvuođaid ossodahkii, man váldohálddahus lea Vuonnabađas Finnmárkkus. www.samediggi.no

Sámi kulturmuittut
Sámi kulturmuittut sáhttet leat hávdesajit, bálvvosbáikkit ja bassi báikkit, goahtesajit, bivdorusttegat, boazodoalu vurkkodan-, bohčin- ja merkenbáikkit, mearrasámi smávvadálut ja niittut, muitalusbáikkit ja eará muittut mat gullet sámi árbevirolaš ássanguovlluide. Sámi kulturmuitosuodjaleami hárrái deattuhit erenoamážit ovttasdoaimma luondduin ja lundui gullevaš eavttuiguin, namalassii ollislaš kulturduovdaga.

Ealli árbevierru
Doppe gos sámi ássan ja geavaheapmi lea eallime, leat ollu sámi kulturmuittut ain ealli árbevierrun. Árbevierut sáhttet leat čadnon ovdalaš áiggi oskku doaimmaheapmái, árbevirolaš resursaávkkástallamii ja luonddus feremii, ja maiddái sihke beaivválaš ja myhtalaš dáhpáhusaide. Muhtun árbevieruin sáhttet leat čiekŋalis ruohttasat. Sámi kulturmuitogáhttemis lea deaŧalaš doaibman áimmahuššat árbevieruid ja daid ovddidit, nu ahte dilálašvuođat lágiduvvojit dasa ahte sámi kulturárbi mii lea čadnon kulturduovdagiidda, sáhttá ain dán áigge leat sámi kultuvrra oassi.