Severinbrauta i Norddal freda

─ Husmannsplassen Severinbrauta, med bygningar, hage og slåtteng som eit samla anlegg, har høg nasjonal verdi. Det er ikkje mange slike husmannsanlegg som er bevart i Noreg, seier riksantikvar Jørn Holme.

Severinbrauta er ein husmannsplass med stovebygning, løe og fjøs. Hageanlegget, som består av frukt-/bærhage, urte-/staudehage samt slåtteeng, er bevart i sin opphavlege form. På husmannsplassar er dette sjeldsynt. Hageanlegget kan difor vere unikt i nasjonal samanheng.

Severinbrauta er eit godt døme på korleis ein har tilpassa seg eit ulendt og bratt terreng og utnytta moglegheitene med jordbruk og nyttehage. Bygningane står nær uendra sidan slutten av 1800-talet, og anlegget har difor særs høg kulturhistorisk og arkitektonisk verdi.