Tilskot til tekniske og industrielle kulturminne i 2017

15 anlegg får støtte gjennom ein fast post i statsbudsjettet til istandsetting, forvalting, drift og vedlikehald.

– Med bevaringsprogrammet for tekniske og industrielle kulturminne ønskjer vi å bevare utvalde historiske anlegg for framtida. Målet er at alle dei 15 anlegga i bevaringsprogrammet skal ha eit normalt vedlikehaldsnivå innan 2020. Årets fordeling  er gjort med tanke på å nå dette målet, seier riksantikvar Jørn Holme.

I 2017 blir istandsettinga av Atlungstad Brenneri ferdigstilt, mens istandsettinga av Bredalsholmen verft, Rjukanbanen, Haldenkanalen og Odda smelteverk vidareførast.

I tillegg til dei 15 utvalde anlegga gir Riksantikvaren fagleg og økonomisk stønad til andre anlegg som dokumenterer norsk teknisk og industriell historie.

Riksantikvaren måtte gjere ei streng prioritering av kva for kulturminne og tiltak som får tilskot. For 2017 fekk vi inn søknader frå totalt 24 tekniske og industrielle kulturminne på til saman 143 millionar kroner. Riksantikvaren hadde rundt 56 millionar kroner til fordeling, som dekkjer om lag 40 % av den samla søknadssummen.